Kooperatibismoa eredu “arrakastatsu” eta lehiakor gisa defendatu du Lehendakariak

Etxebarrian, orain 50 urte betetzen dituen EIKA enpresari egin dion bisitan, euskal kooperatibismoa defendatu du Iñigo Urkulluk, bere arabera, eredu arrakastatsua baita, enpresa lehiakorrak erdiesteko. Arantxa Tapia Ekonomiaren Garapen, Jasangarritasun eta Ingurumeneko sailburuarekin batera, Lehendakariak eta gainerako gonbidatuek Lea-Artibai eskualdeko emakumeei lan egiteko aukera bat eskaintzeko helburuarekin jaiotako enpresa honen instalazioak  zeharkatu dituzte.

Bisita honetan, bertako arduradunen aurrean, unerik zailenetan kooperatiba honek erakutsi duen “kemena” nabarmendu du Lehendakariak, eta EIKA “auzolan” adibidetzat ipini du. Era berean, Iñigo Urkulluk baieztatu du lana partekatzea ezinbestekoa dela, euskal industria sarea garatzeko, finkatzeko, eta “lehiakortasuna eta ongizatea” eskaintzeko.

“Gure konpromisoa – adierazi du – kolektiboa da eta izan behar da” eta lorpen gisara, azpimarratu du, gaur jakin ahal izan denez, Euskadik % 7ko langabezia tasa izan zuela iragan den urtearen laugarren hiruhilekoan, azken 15 urteetako daturik baxuena.

“Lorpen kolektibo horrek lankidetzan jarraitzeko arrazoi gehiago ematen dizkigu” – esanez bukatu du.