Kontsumobidek hipoteka-maileguen gehiegizko klausulen gastuak erreklamatzea gomendatu du

Europar Batasuneko Justizia Auzitegiak urtarrilaren 25ean emandako epaiaren ondoren, Kontsumobidek kontsumitzaileei gomendatzen die erreklamatzeko tasazio, erregistro, gestoria eta notariotza gastuak itzultzea.

EBJAk ebatzi duenez, ezin zen ulertu erreklamatzeko epea gastu horien faktura ordaintzeko unean hasten zenik zenbatzen, horrek babesgabetasuna eragiten baitzion kontsumitzaileari.

Era berean, Europako Auzitegiak erabaki du ezin dela suposatu kontsumitzaile bat jabetzea bere hipotekan abusuzko klausula bat dagoela jurisprudentzia egoteagatik (hori da Espainiako Auzitegi Gorenaren 2019ko urtarrilaren 23ko epaiaren kasua), eta, beraz, epai hori ere ezin dela epearen hasieratzat hartu.

Egoera horren aurrean, Kontsumobideko zerbitzu juridikoak Europar Batasuneko Justizia Auzitegiaren erabakiaren ondorioak aztertzen ari dira. Ez da ahaztu behar erabaki hori Bartzelonako Probintzia Auzitegiak egindako bi auzi prejudiziali erantzunez hartu dela, baina ebazteko dagoela Auzitegi Gorenak Europako auzitegietan aurkeztutako beste auzi prejudizial bat.

Nolanahi ere, Kontsumobidek ondorioztatu du beste eszenario batzuk ere zabaltzen direla, kontsumitzailearen aldekoak. Eszenario horien arabera, Kontsumoko Euskal Institutuaren gomendioa da hipoteka-kreditua 2019ko ekainaren 16a baino lehen sinatu zuten pertsonek beren banketxeko bezeroaren arretarako zerbitzuaren aurrean erreklamatzea abusuzko klausula aitor dezatela, eta bidegabe ordaindutako zenbatekoak lehenbailehen itzul ditzatela.

Urtarrilaren 15eko prentsa-oharrean azaldu genuenez, erreklamazioa banketxeko Bezeroaren Arreta Zerbitzura edo Bezeroaren Defendatzailera zuzendu behar da, eta gehienez hilabeteko epean erantzun behar du. Funtsezkoa da erreklamazioa zerbitzu espezifiko honetan aurkeztea, bulego konbentzional batean aurkeztea aurkeztu gabekotzat jo baitaiteke. Kontsumobidek erreklamazio-eredu bat eskaintzen du esteka honetan.

Auzitegi Gorenak berretsitako epai batzuen arabera, hipoteka-mailegua ematen duen banketxeak bere gain hartu behar ditu gestoria-, tasazio- eta erregistro-gastu guztiak, baita notaritza-gastuen % 50 ere.