Unibertsitateetako Ikastetxe Nagusiek gogoeta egingo dute goi mailako hezkuntzak GJHekin duen konpromisoari buruz

Hiru egunez, otsailaren 14tik 16ra bitartean, Espainia eta Italia osoko 70 unibertsitate mailako ikastetxe nagusitatik etorritako 250 parte hartzaile baino gehiago bilduko dira Bilbon, Unibertsitateetako Ikastetxe Nagusien XLV. Jardunaldietan; Deustuko Unibertsitatea, Euskal Herriko Unibertsitatea (UPV/EHU) eta Mondragon Unibertsitatea izango dira antolatzaile eta anfitrioi. Ikastetxe nagusietako eta EAEko unibertsitateetako zuzendaritza taldeetako kideek, unibertsitateetako kideek eta garapen jasangarriaren eta Agenda 2030en arloko aditu ezagunek mintegietan, hitzaldietan eta lan mahaietan parte hartuko dute, «Ikastetxe nagusiak eta GJHak: konpromisoa eta aldatzeko ahalmena» gaiari buruz hausnartzeko, eta Bilbao ideia sortzaile bihurtuko da, goi mailako hezkuntzak dituen erronka berriei aurre egiteko.

Hasiera ekitaldia Deustuko Unibertsitateko Paraninfoan egingo da. Han izango dira Juan José Etxeberria jauna, Deustuko Unibertsitateko errektorea; Vicente Atxa Uribe jauna, Mondragon Unibertsitateko errektorea; Gorka Moreno Márquez jauna, EHUko Bizkaiko Campuseko errektoreordea; eta Antonio Navajas Jiménez jauna, Espainiako Unibertsitateetako Ikastetxe Nagusien Kontseiluko presidentea. Hasierako hitzaldi magistrala, berriz, Olatz Ukarrek eskainiko du, industria ingeniari ezagunak, Deustuko Unibertsitateko doktoreak eta garapen jasangarriarekin eta ingurumenarekin lotutako nazioarteko proiektuetan aritzen denak.

Jardunaldien inaugurazioaren ondoren, hitzaldiak eta mintegiak hasiko dira Deustoko unibertsitate guneko hainbat tokitan, EHUko Bizkaia Aretoan eta Mondragon Unibertsitateko As fabrik campusean. Lan saioetan, 2030 Agendan jasotako Garapen Jasangarrirako Helburuetako (GJH) hiru landuko dira: kalitatezko hezkuntza, Xabier Murelaga Bereicua jaunaren eta Mikel Aranburu Barandiaran jaunaren eskutik; lan duina eta hazkunde ekonomikoa, María Rodríguez Díez andrearen eskutik; eta desberdintasunak murriztea, Estíbaliz Sáez de Cámara andrearen eskutik.

«Jardunaldiak elkarrizketarako eta baterako lanerako gune izatea nahi dugu, 2030 Agendak unibertsitate eta eskola komunitatearentzat dituen erronkak eta aukerak aztertu eta hausnartu ahal izateko. Gero eta pluralagoa eta anitzagoa den gizarte batean eta globalizazioak eta unibertsaltasunak markatutako ingurunean, GJHak ikastetxe nagusien eta unibertsitatearen erabakien eta jardueraren muinean integratu behar ditugu. Horrela bakarrik ulertu ahal izango dugu inguratzen gaituen mundua eta modu asertiboan erantzun ahal izango diegu goi mailako hezkuntzak dituen erronka berriei «, aurreratu du Antonio Navajasek, Unibertsitateetako Ikastetxe Nagusien Kontseiluko presidenteak. «Asko dira datozen urteei begira ageri zaizkigun zalantzak, eta gure ikasleekin batera, hobeto egokitzen lagunduko diguten tresnak identifikatu nahi ditugu, igogailu sozial eta Unibertsitatearen osagarri gisa dugun funtzioa betetzen jarraitu ahal izateko», gaineratu du.

Adierazpen horiekin bat egin du Deustuko Unibertsitateko errektore Juan José Etxeberria jaunak eta azpimarratu du «ikastetxe nagusiek kalitatezko ostatua eman behar dutela, baina garrantzitsuagoa dela gazteen hezkuntza integralean laguntzea, familiek gugan duten konfiantza kontuan hartuta. Biltzar honetan esperientziak, bizipenak, egoerak eta proiektuak trukatu ahal izaten dira urtero. Horrela, ez da erakunde bakoitzaren proiektua bakarrik sustatzen, amets egin dezakegu nola eragin dezakegun elkarrekin ikasleen bizitzan eta, horrela, topaketa horrek organismo hobeak eta sendoagoak izaten lagunduko digu, elkarrekin ari garelako «.

Bestalde, Vicente Atxa Mondragon Unibertsitateko errektoreak nabarmendu duenez, «argi dago aldaketa garaian bizi garela. Dena aldatzen ari den testuinguru horretan, unibertsitateok eboluzioa, edo, hobeto esanda, iraultza, gidatu behar dugu, ikasgelan hasita. Inguruan duguna entzun, ezagutu, xurgatu eta interpretatu behar dugu, aldaketa teknologiko eta digitalizazioranzko aurrerapena gidatu ahal izateko, baina, batez ere, gure ikasleei ezagutzarako bidaia paregabe batean laguntzeko eta gidatzeko lan zoragarria dugu: profesional bikain bihurtzeko beharrezkoak izango dituzten tresnak eta baliabideak eskaintzeko gai izan behar dugu, ingurunearekin konprometituta dauden eta inguruan duten guztiarekiko sentikorrak diren gizabanako bihurtzeko «. Bilakaera eraldatzaile hori «ikasgelan hasten da, baina ez bakarrik han, unibertsitateak hainbat prestakuntza espazio baititu, pertsonaren garapen osorako aukera bermatzen dutenak. Ikastetxe Nagusia gune horietako bat da «, gaineratu du.

Azkenik, EHU pozik agertu da jardunaldi hauetan parte hartu eta lagundu ahal izateagatik: «EHUrentzat luxua eta plazera da anfitrioi izatea, Deustuko Unibertsitatearekin eta Mondragon Unibertsitatearekin batera, Unibertsitateetako Ikastetxe Nagusien XLV. Jardunaldi hauetan», adierazi zuen Gorka Moreno Bizkaiko Campuseko errektoreordeak. Amaitzeko, «unibertsitateko ikaslearen parte hartze aktiboa sustatzen duten» lekuak eraikitzearen garrantzia zehaztu zuen, «Garapen Jasangarriko Helburuen garapenean oinarritutako jarduera akademiko arautua baino haratago, horixe baita jardunaldi hauetako gai nagusia».

Espainiako unibertsitateetako ikastetxe nagusien kontseiluari buruz

Espainiako Unibertsitateetako Ikastetxe Nagusien Kontseilua estatu mailako elkartea da, 110 kide ditu, eta honako helburu hauek ditu: unibertsitate esparruan Ikastetxe Nagusien izaera eta funtzio nagusia zaintzea, Espainiako Estatuko Ikastetxe Nagusien arteko komunikazio eta lankidetzarako tresna izatea, eta kolektiboaren interes orokorrak bere gain hartzea eta ordezkatzea.

1979an sortu zen, Kordoban egindako Ikastetxe Nagusien II. Jardunaldietan, eta 1980an, Madrilen izandako Ikastetxe Nagusien III. Jardunaldietan, Kontseiluaren Araudia onartu zen Ikastetxe Nagusien Batzorde Nazionalean.