Ikusmen-desgaitasuna duten eta braille irakurtzen dakiten pertsonek, lehenengo aldiz, bozkatzeko dokumentazio egokitua jaso ahal izango dute etxean

% 33ko edo gehiagoko ikusmen-desgaitasuna duten pertsonek, edo ONCEkoak direnek, eta braillea irakurtzen dakitenek, segurtasun osoz eta konfidentzialtasuna bermatuta eman ahal izango dute botoa datorren apirilaren 21ean. Botazio-sistema egokitu hori eskatzeko epea irekita dago Eusko Jaurlaritzaren herritarren arretarako 012 doako telefonoan. Eskaera egiteko epea martxoaren 25ean amaituko da.

Eskaera egiten denean, Eusko Jaurlaritzak braillen bidaliko ditu dokumentazioa eta boto-paperak zigilatutako maleta batean. Eskaera egin duen pertsona horrek erabaki ahal izango du etxean edo lantokian jaso nahi duen, bozketa-egunean prestatuta eramateko, edo hauteskunde-mahaian bertan jaso nahi duen apirilaren 21ean, igandean, botoa emateko eskubidea bertan gauzatu ahal izateko, aurrekoetan bezala.

Inklusioan aurrera egiten

Eusko Jaurlaritzako hauteskunde-prozesuen zerbitzuko profesionaletako batek, Olalla Marañón Martínek, azaldu duenez, “sistema horrek urteak daramatza ezarrita, baina lehenengo aldia da, Eusko Jaurlaritzak eskatuta, Hauteskunde Batzordeak aukera ematen duena dokumentazioa eta boto-paperak braillen etxeetara, bozketa-eguna baino lehen, behar besteko aurrerapenez, bidaltzeko. Orain arte, bozketa-egunean hauteskunde-mahaira bidaltzeko aukera bakarrik zegoen, eta Eusko Jaurlaritzarentzat pozgarria da aldaketa, ikusmen-dibertsitate funtzionala duten pertsonen inklusioan aurrerapauso handia baita. Gainera, berdintasunezko tratuaren eta ikusmen-desgaitasuna duten pertsonen autonomia funtzionala sustatzearen alde borrokan ari diren elkarteen helburu historiko bati ere erantzuten dio”.