Oporrak Bakean programak Donostiako familiak bilatzen ditu haur horiei harrera egiteko
Beste uda batez, Donostiak Oporrak Bakean-Vacaciones en Paz programa aurrera eramango du. Programa hori Euskadi osoan garatzen da duela urte batzuetatik hona, eta gure lurraldera hurbiltzen ditu Saharako haurrak, Aljeriako basamortuan dituzten errefuxiatuen kanpamentuetatik urrun opor-egun batzuk har ditzaten.
Cristina Lagé Inklusio eta Berdintasun zinegotziak dei egin die donostiarrei «harrera egiteko sen tradizionalari, haur horien ametsa egia bihur dadin; izan ere, opor-egun batzuk beren egunerokotasunetik kanpo igarotzea merezi dute, basamortuan erbestealdi bidegabea izateko baldintza gogorrek baldintzatuta. Udan ume horiek hartu nahi dituzten familiak behar ditugu, haien egonaldia aprobetxatuz dagozkien azterketa medikoak egiteko eta hondartzaz eta guk ia baloratzen ez ditugun beste gauza batzuez gozatzeko aukera eskainiz, haientzat, ordea, aurkikuntza handiak baitira”.
Helburua gure hirian 15 haur sahararren harrera lortzea da. Haur horietako 8k familia bat dute esleituta, eta, aurreko esperientziak ikusita, uda honetan errepikatu nahi dutela adierazi dute. Hala, 7 haur geratzen dira harrera horren zain. Interesa duten familiek informazio-bilera batean parte har dezakete martxoaren 20an, 17:30ean, Udaletxean, eta bertan baldintza guztien berri emango zaie.
Aniztasun, Gizarteratze eta Berdintasun Sailak kanpainari buruzko informazioa bidaliko die ikastetxeei, haurtxokoei eta hiriko beste gune interesgarri batzuei. Haur horietako baten harrera eskatzeko epea apirilaren 15ean amaituko da.
Oporrak Bakean ekimenak 38 urte daramatza martxan gure hirian Fronte Polisarioaren eskutik, eta saharar herriarekiko elkartasunaren eta ohiturak, kulturak eta bizitzeko ohiturak partekatzeko aukera paregabea da. Aurten, parte hartzen duten Euskadiko udalerrietara 8 eta 12 urte bitarteko 300 haur saharar iristea da helburua.
Izena emateko eta kanpainan parte hartzeko
Informazio pertsonalizatua jasotzeko eta izena emateko
Lankidetzako bulegoan
Aiete jauregia
Aiete pasealekua, 65. 1.
20009 DONOSTIA
Tel.: 630 533 468/943 48 14 71
Posta elektronikoa: oporrakbakean@donostia.eus
www.oporrakbakeandonostia.eus/eu