Ertzaintzak bi pertsona atxilotu ditu Lanbideren aurka iruzur egiteagatik eta dokumentuak faltsutzeagatik

Ertzaintzako agenteek bi gizon atxilotu dituzte iruzurrez gizarte-laguntzetan 300.000 euro inguru jaso ostean. Euskal Enplegu Zerbitzuaren salaketa baten ondorioz egindako ikerketei esker, atxilotuek laguntzak lortzeko erabilitako taktikak argitara atera ahal izan dira.

Ertzaintzako Ikerketa Kriminaleko Zerbitzuko agenteek egindako ikerketa abuztuan hasi zen, Bizkaiko Probintzia Fiskaltzaren ofizio bat jaso ondoren, gizarte-laguntzen arloko ustezko delitu-egitate batengatik.

Lanbide – Euskal Enplegu Zerbitzuak emandako informazioan oinarrituta (Fiskaltzari eman zion gertakarien berri), ikerketaz arduratzen ziren agenteek egiaztatu ahal izan zuten bi ezkontza zeudela gertakarietan inplikatuta, eta bikoteko bi gizonek familia-lotura zutela. Egindako jarduketei esker, susmagarriek dokumentu publikoak faltsutu zituztela egiaztatu zuten, administrazio publikoaren prestazioak jasotzeko. Ikerketatik eta egindako ekintzetatik jakin zen inplikatutako pertsonek deklaratu gabeko jabetzako bi etxebizitza zituztela Bilbon eta Zornotzan, eta bi senar-emazteek dibortziatuta zeudenaren itxura egiten zutela, nahiz eta benetan bakoitza bere bikotekidearekin eta bere familiekin bizi. Era berean, bi gizonetako batek nortasun faltsua sortu zuen laguntza-eskaera bikoizteko.

Lanbidek eskaeretan irregulartasunik antzeman ez zezan, orain atzemandakoak familia-bizilekuak trukatuz erroldatzen ziren.

Kalkuluen arabera, 300.000 euro inguru jaso dituzte diru-sarrerak bermatzeko errentarako laguntzetan, etxebizitzak alokatzeko laguntzetan eta bizitzeko gutxieneko diru-sarreretan.

Ebidentzia horiek ikusita, bi bikoteetako gizonak joan den astean atxilotu zituzten, iruzur egitea eta dokumentuak faltsutzea egotzita. Eginbideak amaitutakoan, epailearen esku utzi zituzten. Hala ere, Ertzaintzak ikertzen jarraitzen du, eta ez da baztertzen pertsona horien aurkako ekintza penal gehiago egitea.