PRUEBA
Bulegoa erreferentzia-puntu presentziala izango da IGEari buruzko zalantzak argitzeko eta beharrezko izapideak egiteko, abian jarri eta lehen 6 hilabeteetan
Donostiako Udalak arreta-bulego bat izango du gaurtik aurrera, herritarrek datozen asteetan abian jarriko den Isuri Gutxiko Eremuari (IGE) buruz dituzten zalantzei erantzuteko bideratuta. Erreferentzia-puntu horretaz gain, Udalak beste informazio-kanal osagarri batzuk ere jarri ditu abian, hala nola telefono bidezko arreta eta online tramiteak egiteko aukera emango duen webgune bat.
Bulegoa Arroka plazako 5. zenbakian dago, eta datozen 6 hilabeteetan egongo da irekita. Lau arreta-postu izango ditu, IGEari buruzko informazioa emateko eta behar diren izapideak aurrez aurre egin nahi dituzten pertsonei laguntzeko.
Isuri Gutxiko Eremuko erreferentzia-puntu hori:
- astelehenetik ostiralera egongo da irekita,
- 9:00etatik 14:00etara (asteazkenetan ere 16:00etatik 18:00etara),
Eta, gainera, Udalinforekin harremanetan jartzeko ohiko zenbakiaren bidez telefono bidezko laguntza eskainiko du:
- 010
- 943481000, udalerritik kanpo
Telefono bidezko arretaren kasuan, Udalak laguntza birtualeko sistema bat gaitu du bulegoak itxita edo linea guztiak okupatuta daudenean arreta emateko, etengabeko zerbitzua bermatzeko helburuarekin.
Informazio eta izapideetarako webgunea
Aurrez aurreko eta telefono bidezko arretaz gain, Udalak donostia.eus/ige webgunea gaitu du Isuri Gutxiko Eremuari buruzko informazio guztia eskaintzeko, eta, gainera, baimenak eskatzeko izapideak egiteko kanala da, beharrezkoa izanez gero (ezingo da izapiderik egin behin betiko indarrean sartu baino lehen).
Gune honek, halaber, oso erabilgarriak diren hainbat tresna ditu, ibilgailu bakoitzaren ingurumen-bereizgarria matrikularen bidez kontsultatzeko aukera emango baitu, araudiarekiko duen egoera zuzenean jakinaraziz. Eta IGEak hartzen duen eremu zehatza erakusteko, atari honek mapa interaktibo bat izango du, kalez kaleko eremuaren perimetroa xehetasunez ikusteko aukera ematen duena.
Isuri Gutxiko Eremua abian jartzea
Donostiako Isuri Gutxiko Eremua indarrean jarriko da hasierako fasean, behin azaroaren 21eko Udalbatzan hura arautzen duen ordenantza behin betiko onartu eta Gipuzkoako Aldizkari Ofizialean argitaratu ondoren.
Horrela, egokitzapen eta informazio fase bat hasiko da, herritarrak erregulazio berriarekin ohitu daitezen eta zuzeneko baimenik ez duten pertsonek dagokien baimena izapidetu ahal izan dezaten. Baimen hori web orrian zein IGEaren bulegoetan izapidetu ahal izango da.
Urtarrilean jarriko dira martxan sarbide-kontroleko kamerak, eta urtarrilean eta otsailean araudia betetzen ez duten pertsona guztiek informazio-jakinarazpen bat jasoko dute, arau-hauste bat egin dutela jakin dezaten. Eta martxotik aurrera, ordenantza betetzen ez duten ibilgailei isunak jartzen hasiko dira.
Aurkezpena
Gaur goizean egin den aurkezpenean, Ana Lopez Gobernantza Ireki, Digital eta Kolaboratiboko zinegotzia, Iñigo García Ingurumen zinegotzia eta Olatz Yarza Mugikortasun eta Garraio Jasangarriko zinegotzia bildu dira.
Ana Lopezek azpimarratu duenez, «Donostiako Udalak konpromiso sendoa du donostiarrei kalitatezko arreta zuzen eta eraginkorra eskaintzeko. Horregatik, Isuri Gutxiko Eremuaren tamainako proiektu batek, hirian aldaketa garrantzitsua ekarriko duenak, erreferentzia-puntu bat behar du haren funtzionamenduari buruzko zalantzak dituzten pertsona guztientzat «.
Ingurumeneko zinegotzi Iñigo Garcíak, bere aldetik, adierazi duenez, «Isuri Gutxiko Eremua ezartzeak gure ingurunea eta osasun publikoa babesteko konpromiso sendo eta beharrezko bati erantzuten dio. Gure herrialdean bizi izan ditugun muturreko fenomeno meteorologikoek argi eta garbi erakusten dizkigute klima-aldaketa gero eta nabarmenago baten ondorioak. IGEaren helburua gure hirian isuri kutsatzaileak murriztea da, eta trafiko guztia kendu ezin badugu ere, krisi klimatiko honen erantzule diren gasak minimizatzeko konpromisoa hartu dugu. Ez da aukerako neurria, erantzukizun partekatua baizik, eta, bereziki, erakundeetatik hartu behar dugu gure gain, gizarte osoaren onerako».
Mugikortasunari dagokionez, Olatz Yarza zinegotziak nabarmendu duenez, «funtsezkoa den eraldaketa-puntu batean gaude, eta hiri atseginago eta jasangarriago baterantz goaz garraiobide guztietan egiten ari diren aldaketen bidez, besteak beste, ibilgailu pribatuari dagokionez. Isuri Gutxiko Eremua ezartzearekin batera, Udal Gobernuak bultzatutako beste ekintza asko ere egin dira, hala nola garraio publikoko flota elektrifikatzea edo oinezkoentzako hiri-espazioak berreskuratzea, eta horrek airearen kalitate hobea, kutsadura akustiko txikiagoa eta, azken finean, bizi-kalitate hobea ekarriko ditu».