“Aurrerapausu itzela emateko aukera bikaina dugu”

Ernesto Valverdek eta Gorka Guruzetak, Europa Leagueko Ligako Faseko zazpigarren jardunaldiari dagokion Besiktas JK – Athletic Club neurketaren atarikoan, Tüpraş Stadyumu zelaian komunikabideak artatu dituzte

Prentsaurrekoa hasi aurretik, Ernesto Valverdek elkartasun mezua bidali nahi izan dui herri turkiarrari Boluko eski-estazioko hotel batean izandako sute larriaren ondorioz: «Elkartasuna adierazi nahi diegu eski estazioko istripuan kaltetutakoei. Gugandik gertu ere antzeko gertaera bat gertatu da eta kaltetuen familia eta senideei besarkada bat eskaini nahi diegu«.

Kirol arloari dagokionez, entrenatzaile zuri-gorriak azpimarratu du datorren asteazkeneko aurkaria «garaipena eskuratzera behartuta dago, eta horrek oso aurkari arriskutsua bilakatzen du Besiktas. Aurrerapauso garrantzitsua emateko aukera dugu, baina badakigu oso zaila izango dela. Orain, entrenatzaile berri baten etorrerak motibatuta daude eta jokalari handiak dituen taldea da. Gure jokoa egiten eta hiru puntuak lortzen saiatuko gara«.

Ernesto Valverdek argi utzi egin du zein den Athletic Cluben helburua Europa Leagueko Liga Fasea amaitzeko bi neurketa falta direnean: «Zuzenean final-zortzirenetara igaro nahi dugu. Talde guztiok bilatzen dugun zerbait da, kanporaketa batetik salbatu ahal izatea eta final-zortzirenetara zuzenean pasatzea. Horretarako bihar gauzak ondo egin behar ditugu eta hiru puntuak eskuratu«.

Bestalde, Gorka Guruzetak, bere teknikariaren ildotik, taldea Turkiara gogotsu itzuli dela adierazi du: «Biharko norgehiagoka aurrera ateratzeko eta lehen postuak lortzeko ilusio guztiarekin gatoz. Oso partida onak egin ditugu Europako txapelketan eta bihar pastelari ginga jarri nahi diogu«.

Aurrelariak honela hitz egin du Besiktas eta Ole Gunnar Solsjkaer arrano beltzen entrenatzaile berria aulkian izatearen egoera berriari buruz: «Bihar ziurrenik Besiktaseko entrenatzaile berriarekin taldeak zenbait gauza aldatuko ditu, baina guk geurean zentratu behar dugu, neurketa zaildu behar diegu eta garaipena lortzeko abaguneak sortu«.