Landatu Solarrek, bere produktu berritzaileen bidez, eguzki-panelak instalatzea errazten du – SPRI

Eguzki-instalazioak sinplifikatzen dituzten produktuak diseinatzen eta merkaturatzen ditu Landatu Solar enpresak. Teilatuetan eta zoru lauetan daudenak hormigoizko blokeen bidez egiten dira, eta horien gainean jartzen da eguzki-panela. 60 eta 70 kilo arteko hormigoizko bloke horiek garraiatzeko eta instalatzeko zailak dira. Alternatiba gisa, Landatu Solarrek Landblock produktua eskaintzen du: pilatuta garraiatzen den ur bidezko lastra-euskarria (tapak eta oinarriak etxeko tuperrak bezala pilatzen dira). Hori urez edo beste edozein materialez betetzen da, hareaz edo legarrez, adibidez. Lekualdatzeko eta instalatzeko erraza da, eta eguzki-proiektuaren kostuan aurrezpen handia du. 

Bestalde, enpresak eguzki-energia flotatzailerako soluzioak eskaintzen ditu, ur gainean flotagailuen bidez jartzen diren instalazioak. Normalean, flotagailu horiek leku asko hartzen dute, eta gehiago kostatzen da garraiatzea produktu beraren kostua baino. Antzeko kontzeptuarekin, Landatuk Lamaru sistema merkaturatzen du: bi zatitan banatutako flotagailu bat, “lehiakideek baino sei aldiz flotagailu gehiago garraiatzea eta merkeago fabrikatzea lortzen duena”, Cristian Martín enpresaren sortzaileetako batek zehaztu duenez. Gainera, irtenbide paregabeak eskaintzen ditu ainguratze-sisteman. Eguzki-sistema flotatzaileak diseinatzeko software espezializatua du, eta proiektuak gauzatzeko aholkuak eta laguntza ematen ditu. 

Konpainia sortzeko ideia 2020an jaio zen, eguzki-energia flotatzaileak eskaintzen duen hazkunde-potentziala ikertzearen ondorioz. Sortzaileek, energia berriztagarrietan interesa duten ingeniariak, ikusi zuten, instalazio batera, ehunka mila flotagailu garraiatu behar izateak sortzen zuen arazoa. “Berehala ohartu ginen tuper motako sistema batekin garraioa erraztu eta instalazioaren kostuetan asko aurreztea lortuko zela, karbono-aztarna txikiagoa izateaz gain”, adierazi du Martinek. 

Era berean, gaineratu duenez, “urte batzuk lehenago berriztagarrien sektorean lan egin genuen, gure aletxoa ekartzeak motibatzen baikaitu trantsizio energetikoa bizkortzeko eta eguzki-energia instalatutako potentzia handitzen joateko”. Martinek azaldu duenez, “ur gaineko energia flotagarriak inpaktu gutxien duen energia berriztagarria dela esaten da, ura lurruntzea saihesten duelako; eguzki-panelen ekoizpena handitzen du, lehorrekoarekiko; eta uretan algak ez ugaritzea eragiten du, kimikoen erabilera saihestuz”. 

Bezeroei dagokienez, material fotovoltaikoa saltzen duten elektrizitate-banatzaileak dira. Espainian ez ezik, Alemanian, Suitzan, Irlandan eta Kolonbian ere saltzen du. Horrela, bere “lehen proiektu handia” Gran Canaria Arena kirol pabiloian izan zen, 770 kilowatteko planta fotovoltaikoa instalatuz, bere kontsumo elektrikoaren % 100 sortzeko aukera ematen diona. Gainera, Euskal Autonomia Erkidegoko sareari lotutako lehen eguzki-instalazio flotagarria jarri zuen, eta aurten ia 1MW-eko potentziadun ureztatze-putzu bat sortuko du Mallorcan, Ferrovialen eskutik. 

Etorkizunari begira, Landatu Solarren helburua argia da: hazten jarraitzea, produktu berriak garatzea eta gero eta herrialde gehiagotan presentzia izatea. 

Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.   

SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.