Lau pertsona atxilotu dituzte Gernikan estortsioa eta mehatxuak leporatuta

Asteazken arratsaldean, Ertzaintzako agenteek 28 urtetik 31 urtera bitarteko bi gizon eta bi emakume atxilotu zituzten Gernikan, estortsio-delitu jarraitu batean inplikatuta egoteagatik. Biktimak, mehatxupean, 300.000 euro eman zizkien.

Lau pertsona atxilotu dituzte Gernikan estortsioa eta mehatxuak leporatuta

Asteazken arratsaldean, Ertzaintzako agenteek 28 urtetik 31 urtera bitarteko bi gizon eta bi emakume atxilotu zituzten Gernikan, estortsio-delitu jarraitu batean inplikatuta egoteagatik. Biktimak, mehatxupean, 300.000 euro eman zizkien.

Xantaia 2023. urtearen amaieran hasi zen, biktimak emakume bat ezagutu zuenean eta harekin telefonoz sexu izaerako elkarrizketak izaten hasi zenean. Harreman horren ondorioz, bere eta familiaren aurkako mehatxuak jasotzen hasi zen telefono-deien bidez pertsona batzuen aldetik, diru-kopuru handiak eskatuz.  Pertsona horiek sortzen zioten beldurraren ondorioz, biktimak eskudirutan ordaindu zien hainbat aldiz xantaiagileei, eta gaur egun hirurehun mila eurotik gora dira.

Iazko uztailaren amaieran, biktimak estortsioa egiten ari zitzaizkion pertsonen berri izateari utzi zion, aurtengo otsailaren hasierara arte, berriz hasi baitzitzaizkion telefonoz deitzen diru gehiago eskatuz.  

Xantaiagileen eskakizunei aurre egiteko modurik ez zuenez, biktimak Gernikako Ertzain-etxean salatu zituen egitateak.  

Egoeraren berri izan eta estortsiogileek 46.000 euro eskatuz biktimari egindako azken deiaren lekukoak izan ondoren, joan den asteartean zaintza-dispositibo bat ezarri zuten dirua emateko hitzordua jarri zuten lekuan. Biktimarekin harremanetan jarri zirenean, operatiboko agenteek horietako hiru, bi gizon eta emakume bat, atzeman zituzten, eta estortsio eta mehatxu delitu baten ustezko egile gisa atxilotu zituzten. Gertakarietan inplikatutako beste emakumea handik pixka batera atxilotu zuten, polizia-egoitzara agertzeko deitu ondoren.  

Atxilotuetako batek aurrekariak ditu hilabete honen hasieran gertatutako antzeko gertakari batengatik, adimen-desgaitasuna duen pertsona bati estortsioa egin ondoren.  Pertsona horrek, mehatxuen eta koakzioen bidez, hamabi mila eurotik gora lortu zituen heriotza-mehatxuak egiten zizkion biktimarengandik.