Isuri Gutxiko Eremura egokitzeko epea datorren ostiralean amaituko da

Hala, IGEa bere lehen fasean bete-betean sartuta egongo da, hiru hilabeteko egokitzapen epe baten ondoren. Epe horretan, herritarrek aukera izan dute arau berriari buruzko zalantzak argitzeko eta beharrezko izapideak egiteko, hala eskatzen duten kasuetan.

Urtarrilean informazio kanpaina bat hasi zen, eta horren bidez, martxoaren 1ean, guztira 7.685 jakinarazpen bidali zaizkie gunera baimenik gabe sartu diren ibilgailuei, bai baimena jasotzeko baldintzak ez betetzeagatik, bai dagokion eskaerarekin egoera erregulatu ez izanagatik. Jakinarazpen horiek DGTren ibilgailuen erroldan erregistratutako helbideetara bidali dira.

Jakinarazpen honen helburua da araudia bete ez duten pertsonei gogoraraztea, sartzeko arrazoia salbuetsitako kasuetan egonez gero, haien egoera erregulatu dezaketela, dagokion baimena tramitatuz, bai www.donostia.eus/ige web orrian, bai Arroka plazako IGEaren informazio bulegoetan.

Datorren ostiraletik aurrera, beren egoera erregulatu ez duten ibilgailuek (dagokion baimena izapidetu ez dutelako, edo baimendutako kasuen artean ez daudelako) 200 euroko isuna jasoko dute Isuri Gutxiko Eremura sartzean, eta kopuru hori %30 igo daiteke berreroriz gero (arau-hauste bat baino gehiago urtebetean).

Lehen fasearen behin betiko ezarpena

Martxoaren 14tik 2028ra arte, ingurumen etiketarik ez duten ibilgailuak ezin izango dira Isuri Gutxiko Eremura sartu, salbu eta baimen zuzena duten salbuespenezko kasuetan eta baimen puntuala, aldi baterakoa edo iraunkorra eska dezaketen beste kasu batzuetan. 2028tik aurrera, bigarren fasean, ingurumen-etiketa edo B etiketa duten ibilgailuak ezin izango dira IGEra sartu, salbuespenezko kasuetan izan ezik.

Baimenei buruzko informazio guztia www.donostia.eus/ige webgunean kontsulta daiteke. Bertan, gainera, ibilgailu bakoitzaren ingurumen-etiketa ezagutu daiteke, matrikula-zenbakiaren bidez. Ez da beharrezkoa bereizgarri hori ibilgailuan jartzea, hiriko sarreretan matrikulak irakurtzeko dauden kameren bidez egiten baita egiaztapena.

Informazio kanalak

Udalak herritarrei informazioa eta arreta emateko hainbat bide ditu, hala nola Isuri Gutxiko Eremuaren bulegoa, telefono bidezko arreta eta online izapideak egiteko aukera ematen duen webgunea:

• IGE bulegoa: Arroka plaza, 5 – astelehenetik ostiralera 9:00etatik 14:00etara (asteazkenetan 16:00etatik 18:00etara)
• Telefono bidezko arreta: 010 / 943 481 000, udalerritik kanpo
• Webgunea: www.donostia.eus/ige

Gainera, Udala eskuorri bat postontzietan banatzen ari da hiriko etxe guztietara, zalantza ohikoenak argitzeko eta IGEari dagozkion informazio-kanalak adierazteko.

Izapidetutako eskaerak

Isuri Gutxiko Eremua indarrean jarri zenetik martxoaren 1era arte 22.764 baimen eskaera erregistratu dira guztira. Horietatik, 984 ibilgailu nazionalenak dira, eta 21.780, berriz, atzerritarrenak. Azpimarratu behar da eskaeren %95,7 atzerriko ibilgailuetatik datozela, bertara sartzen diren atzerriko matrikuladun ibilgailu guztiek sarbidea izapidetu behar dutelako.

DGTn erregistratutako matrikula duten ibilgailuek izapidetutako 984 eskaeretatik, %14 ez ziren beharrezkoak, baimena zutelako, ingurumen bereizgarria zutelako edo lehen fase honetan zuzenean baimendutakoen artean jatorriz sartuta zeuden ibilgailuak zirelako (egoiliarrak, etab.).

Baimena izapidetu behar zuten ingurumen-etiketarik gabeko ibilgailuen gainerako %86ren artean, arrazoi ohikoenak honako hauek dira: zerbitzu errepikariak ematea (%30), mugikortasun mugatuko Europako txartela duten pertsonak eramatea (%31) edo garajea jabetzan edo emakida-erregimenean edukitzea (%12).

Datu horiek partikularrek eta enpresa txikiek egindako eskaerei buruzkoak dira; 5 ibilgailu baino gehiagoko flotak dituzten erakundeek egindako eskaeren administrazio-kudeaketak beste prozedura bat jarraitzen du.

IGEra sarrerak

Aldi horretan Isuri Gutxiko Eremura sartu diren ibilgailuen artean, %12 atzerritarrak edo DGTren erregistroan identifikaziorik gabekoak izan ziren (nahitaezkoa da www.donostia.eus/ige webgunearen bidez erregistratzea eremura sartu aurretik).

Sartu ziren ibilgailuen % 84k ingurumen-etiketaren bat zuten eta, beraz, zuzeneko baimena. Ohikoena C etiketa izan da (%48,4), ondoren B etiketa (%20), ECO etiketa (%12) eta ZERO etiketa (%3,6).

Zalantza ohikoenak

2024ko azaroaren erdialdean IGEaren arreta-guneak martxan jarri zirenetik martxoaren 1era arte, 5.429 kontsultari erantzun zaie, aurrez aurre zein telefonoz. Zalantzarik ohikoenak inguru horretan bizi diren pertsonen ibilgailuei (%13) eta atzerriko matrikula duten ibilgailuei (%12) buruzkoak izan dira.