Eusko Jaurlaritzak eta ERNE, ESAN eta SIPE sindikatuek datozen lau urteetarako Ertzaintzaren Akordio Arautzailea sinatu dute

Eusko Jaurlaritzako Segurtasun Sailak eta Ertzaintzaren ordezkaritza sindikalaren hiru laurden baino gehiago duten ERNE, ESAN eta SIPE sindikatuek sinatu dute 2025-2028 aldirako Akordio Arautzailea Ertzaintzaren Negoziazio Mahaiaren esparruan.

Bingen Zupiria Segurtasuneko sailburuak nabarmendu du Ertzaintza gure autogobernuaren ikurra dela eta segurtasuna, berriz, helburu nagusia gure herritarrei zerbitzurik onena ematea duen zerbitzu publikoa. Gaur sinatu den akordioak, azpimarratu du Zupiriak, “Ertzaintzak herritarrei ematen dien zerbitzua hobetzeko eta modernizatzeko balioko du. Horrez gainera, Ertzaintzaren polizia integralaren izaera indartu ere egingo du”. Segurtasuneko sailburuak gaineratu duenez, “gizarteak behar duen zerbitzu publikoa eraikitzen jarraitu ahal izateko, beharrezkoa da guztion inplikazioa”.

Eusko Jaurlaritzak, pixkanaka, 2028ra arte, 45 milioi euro inbertituko ditu etorkizuneko Ertzaintza indartzeko oinarriak finkatzeko. Horretarako, agenteen etengabeko prestakuntza sustatuko da, bai eta ikerketaren eta inteligentziaren arloko espezializazioa ere gaur egungo gizarteak planteatzen dituen erronka berriei aurre egiteko. Kasuak ebaztean ahalik eta efizientziarik handiena izateko ere balioko dute inbertsioek. Hauek dira 2025-2028 aldirako Akordio Arautzaileak jasotzen dituen neurri nagusietako batzuk:

• Gutxieneko soldata igoera, ez lineala, urtean agente bakoitzeko 4.200 euro gordinekoa 2028rako, betiere lanpostu bakoitzaren funtzioetara moldatua.
• Etengabeko prestakuntza sustatzeko garapen profesionalaren osagarria; prestakuntza hori Arkauteko Polizia eta Larrialdietako Euskal Akademiak emango du.
• Entrenamendu ebaluagarrien igoera, hobeto prestatutako agenteak izateko aukera emango duena.
• Herritarrekiko arreta hurbiltzea eta hobetzea, herritarren salaketak kalean bertan artatzeko gailu mugikorrekin.
• Espezializazioa ikerketan, kasuak ahalik eta efizientziarik handienarekin ebazteko.
• Espezializazioa inteligentzian, gaur egungo gizarteak planteatzen dituen erronka eta mehatxu berriei aurre egiteko.
• Familia-kontziliazioa errazteko neurriak.

Legegintzaldiko konpromisoa

Ertzaintzaren Negoziazio Mahaia da lan-harremanak Ertzaintzan ordezkaritza duten ERNE, ESAN, EUSPEL eta SIPE sindikatuekin negoziatzeko esparrua. Aurreko Akordio Arautzailea 2012an sinatu zen. Segurtasun Sailak 2022an hasi zituen Akordio Arautzailea berritzeko negoziazioak, eta legegintzaldi honen hasieran ekin zien berriz. Negoziazio Mahaiak urtarrilaren 22an adostu zituen gaur sinatu den akordiorako oinarriak, joan den asteleheneko 125 Mahaiaren deialdiaren ondoren, sinatu duten sindikatuen oinarriek babestu dituztenak.

Hurrengo urratsa izango da Akordio Arautzailea Gobernu Kontseiluari aurkeztea. Horretarako, behin betiko onartzeko beharrezkoak diren izapide administratibo guztiak jarriko dira abian.

XIII. Legegintzaldiko Gobernu Programako 38. konpromisoan dago jasota “Ertzaintzaren egitura hobetzea eta modernizatzea”, horretarako “Ertzaintzaren lan-baldintzak arautzen dituen akordioari buruzko elkarrizketa eta ituna” bultzatuz. Segurtasuneko sailburuak bere esku-hartzean nabarmendu duenez, gaur Akordio Arautzailea sinatzean “Eusko Jaurlaritzak gizartearen aurrean hartutako konpromisoetako bat” betetzen da. Hitzarmen berria, gainera, Segurtasun Saila, Arkauteko Polizia eta Larrialdietako Euskal Akademiarekin batera, Ertzaintza berrantolatzeko eta berregituratzeko eta, modu horretan, 8.000 agentera iristeko, egiten ari den lanaren barruan kokatzen da.