Euskalmeten arabera, negua ohikoa izan da prezipitazioari dagokionez eta oso beroa tenperaturari dagokionez

• EAEn han-hemenka sakabanatuta dauden leku batzuetan bakarrik kalifika daiteke negua hezea bezala, bereziki Araban
• Batez besteko tenperaturaren anomalia positiboa 1.6 ºC ingurukoa izan da, 1991-2020 aldi normalaren arabera

Euskalmet –Euskal Meteorologia Agentziaren arabera, negu meteorologikoa (abenduaren 1etik otsailaren 28ra bitartean) ohikoa izan da prezipitazioari dagokionez, Euskadin han-hemenka sakabanatuta dauden leku batzuetan izan ezik, bereziki Araban, eta oso beroa tenperaturari dagokionez, 1.6 ºC inguruko anomalia positiboa izan baitu 1991-2020 aldi normalaren arabera.

Euskalmetek emandako datuen arabera, prezipitazio gehien Gipuzkoa ipar-ekialdean, Nafarroako mugan, metatu zen, 700 l/m² inguru, alegia (Eskas 772, Ameraun 697, Añarbe 694 eta Berastegi 681). Aldi berean, bigarren mailako maximoak Kantauriko haranetan erregistratu ziren (Bidania 632 l/m², Ibai Eder 515, Aitzu 498 eta Mallabia 495), bai eta isurialdeen banalerro nagusian ere (Zegama 459 l/m², Otxandio 517 eta Gorbea 497).

Araba hegoaldean, pilatutako prezipitazioa 100-200 l/m² ingurukoa izan zen (Moreda 144 l/m², Zambrana 144, Espejo 186 eta Tobillas 204). Mende hasieratik izandako balioekin alderatuta, balio horiek gutxi gorabehera tarteko posizioan daude, erabateko hezeak izan ziren 2013. eta 2015. urtekoetatik urrun.

Tenperaturari dagokienez, batezbestekoa kostaldean 10 eta 12 ºC artekoa izan zen, eta Arabako Lautadan, aldiz, 6 ºC ingurukoa, hau da, ohikoa denaren gainetik 1.6 ºC lurralde osoan. Mende honetako laugarren negu beroena izan da, duela gutxiko 2020koaren eta 2024koaren atzetik.

Hiruhilekoaren bilakaerari dagokionez, behetik gora joan da. Abendua hilabete beroa izan zen eta urtarrila eta otsaila oso beroak izan dira, eta anomaliak 1.4 ºC eta 2.4 ºC-koak izan dira, hurrenez hurren.  Gainera, izotz-egunak ohikoak baino gutxiago izan dira, batez ere Kantauri isurialdean.

Intsolazioa espero zitekeena baino askoz handiagoa izan da, % 10-25 eguzki-ordu gehiagorekin.  Hiriburuz hiriburu, Bilbok 317 ordu inguru izan ditu, Donostiak 309 eta Gasteizek 329. Zentzu horretan, urtarrila, eta bereziki otsaila, izan ziren aldea markatu zutenak.

Neguan Eusko Jaurlaritzak 77 abisu hori aktibatu zituen, honela banatuta: 3 prezipitazio iraunkorragatik, 8 elurragatik, 17 haizeagatik haizeguneetan, 8 haizeagatik haizeguneak ez diren lekuetan, 13 olatuen altueragatik nabigaziorako, 5 kostaldeko inpaktuagatik, 4 zipriztinengatik eta 19 izotzagatik. Gainera, 10 alerta laranja ere aktibatu zituen: 2 haizeagatik haizeguneetan, 1 haizeagatik haizeguneak ez diren lekuetan, 2 prezipitazio iraunkorragatik, 4 olatuen altueragatik nabigaziorako eta 1 kostaldeko inpaktuagatik.