Ertzaintzako agenteek 18 urteko bi gazte atxilotu dituzte gaur goizaldean Bilbon, lesio-delitu bat egotzita. Kalean izandako eztabaida baten ondoren, beste gazte bat jo dute, eta lurrera erori denean, eraso egiten jarraitu dute.
Gaur goizaldeko 05:00ak aldera, Herritarren Babeserako patruila bat abisu batera joan da Bilboko Telesforo Aranzadi kalean, gazte bat lurrean zegoelako, itxuraz konorterik gabe, eraso bat jasan ondoren.
Lekukoen arabera, eztabaida izan da hainbat pertsonen artean, eta erasotzaileek biktima lurrera erorarazi dute, eta hainbat aldiz kolpatu dute. Osasun-baliabide batek zaurituaren egoera baloratu du, eta Basurtuko Ospitalera eraman du, sudurra hautsita zuelakoan.
Poliziak, bestalde, Abando aldera jo du, gertakariaren ustezko egileak hara joan baitira. Bertan, lau gazte identifikatu dituzte, eta horietako bi erasotzaileen deskribapenarekin bat zetozen. Hori dela eta, zenbait egiaztapen egin ondoren, patruilak atxilotu egin ditu, lesio-delitu bat egotzita.
Bi atxilotuak epailearen esku utziko dituzte, ertzain-etxean izapideak amaitutakoan.