Berriki lortu den berrikuspen fiskalari buruzko akordioa izan da gaur Ogasun eta Finantzako sailburu Noël d’Anjouk Onda Vascan egin duen elkarrizketan jorratutako gaietako bat. Haren ustez, akordio horrek “lehiakorrago bihurtuko ditu euskal enpresak. Berrikuspen fiskal horri buruzko lehen iritzietatik harago, oro har, neurri sorta positiboa da Euskadiko industria sarearentzat”, eta akordio honetan berezko gorputza duen berrikuspen honetan sartutako neurri batzuk zehazten dira, hala nola “I+G+b-a, trantsizio energetikoa, mugikortasuna eta familia eta lana uztartzea bektore horiek hobetzen dituzten neurri zehatzekin”.
Gai horri dagokionez, D’Anjouk hau gogorarazi du: “akordio honek 2014an eta 2018an egindako erreforma osatzen du. Funtzionamendu egokia erakutsi duen eredu batetik gatoz, baina ulertzen dut bakoitzak berrikuspen horren irakurketa partziala egitea, bere interesak zaintzen dituelako”.
Trumpek muga-zergen inguruan iragarri dituen azken neurriak zalantzan jarrita, Ogasun eta Finantzako sailburuak hau aitortu du: “inork ez du errezeta magikorik iragarritako muga-zergen eragin osoari aurre egiteko. Horregatik, testuinguru horretan, premiazkoa da Euskadiren posizioa indartzeko eta eraldaketa-garai honetan etorkizunerako prestatzeko neurriak hartzea”. Ildo horretatik, hau nabarmendu du: “Euskadik aktiboki parte hartu behar du eraldaketa horretan, aliantzak ehunduta eta Europako eztabaidetan bere interesak defendatuta. Euskal Finantza Aliantza Euskadiko finantza-ahalmenak bat etorrarazteko eta ardazteko borondatearekin sortu da”.
Gobernu zentralak araubide erkideko autonomia-erkidegoei zorra barkatzeko iragarri zuen, eta gai horri ere heldu zaio. “Aurreakordio bat dugu araubide komuneko autonomia-erkidegoei zorra barkatzeak kupoan eraginik izan ez dezan. Aurreakordio hori Ekonomia Itunaren Batzorde Mistoaren hurrengo bileran formalizatu beharko dugu”, nabarmendu du, hurrengo bilera horri data jartzeko zain.