Ertzaintzak hiru pertsona atxilotu ditu gaur, asteazkena, goizaldean, lesio-delitu bat leporatuta, Arrigorriagako etxebizitza batean arma zuriekin borrokan aritu ondoren. Akusatuetako bati azaleko ebakia egin diote buruan, eta ospitalera eraman dute.
Bart gauerdian, Ertzaintzak Arrigorriagako (Bizkaia) Santa Isabel auzoko eraikin batean izandako borroka baten berri izan du.
Ibaizabalgo Ertzain-etxeko patruila batzuk hurbildu dira adierazitako etxera, eta eraikineko atea zabaldu duen gizon batekin hitz egin dute. Gizonak odola zuen aurpegian, eta agenteei esan die etxebizitzan zeuden beste pertsona batzuek eraso egin diotela.
Agenteek, gizonaren lesioak ikusita, osasun-laguntza eskatu dute. Une horretan beste bi gizon etxebizitzaren kanpoaldera atera dira eta agenteek identifikatu dituzte. Gorputz-miaketa egin dietenean, Ertzaintzak labana bat aurkitu dio horietako bati.
Jarraian iritsi diren Bizkor taldeko patruilek etxean sartu eta atera nahi ez zuten beste lau pertsona atera dituzte.
Gertatutakoaren berri izan dutenean, agenteek lehenengo hiru gizonak atxilotu dituzte, horien artean zaurituta zegoena, labanekin borrokan aritzeagatik. Hiru gizonak arma zuriz lesioak eragitea leporatuta atxilotu dituzte.
Liskarrean jasandako erasoen ondorioz, buruan azaleko zauria zuen gizona ospitalera eraman dute.
Hiru akusatuak polizia-egoitzara eraman dituzte beharrezko izapideak egin eta, ondoren, epailearen eskuetan jartzeko.