Ertzaintzako agenteek 63 urteko gizon bat atxilotu dute gaur, osteguna, goizaldean, Barakaldoko ostalaritza-establezimendu batean beiratea hautsita sartu ondoren lapurreta egin eta irten denean.
Gaur goizaldeko bostak baino lehentxeago Ertzaintzari jakinarazi diote Barakaldoko taberna bateko intrusio-alarma aktibatu dela. Berehala hurbildu da bertara inguruan zaintza-lanetan ari zen polizia-dotazio bat, eta iritsi denean ikusi du lokaleko beirateak zuen zulo handi batetik pertsona bat irteten ari zela.
Polizia ikustean, susmagarriak ihesari ekin dio, emandako aginduei jaramonik egin gabe, eta inguruko edukiontzi batzuen artean ezkutatu nahian ari zenean atzeman dute. Edukiontzi horietako baten barruan, besteak beste, txanponen blisterrak eta balio ezberdinetako billeteak zituzten eta gizona ezkutatzen saiatu den saski batzuk aurkitu dituzte. Agente jarduleek egiaztatu ahal izan dute dirua establezimenduko kutxa erregistratzailetik lapurtu duela, behartu izanaren zantzu argiak baitzituen. Era berean, inguruan aurkitu dute ustez beiratea hausteko erabili duen mailua ere.
Horren aurrean, eta beharrezko frogaketak egin ondoren, gizona atxilotu dute indarra erabiliz lapurreta egitea leporatuta, eta, jarraian, polizia-egoitzara eraman dute dagozkion eginbideak betetzeko. Horiek amaitutakoan, agintari judizialaren eskuetan jarriko dute.
Egindako ikerketari esker jakin ahal izan dutenez, atxilotua, polizia-aurrekari ugari dituen 63 urteko gizona, bezperan, goizaldean, Trapagarango taberna batean egindako antzeko lapurreta batean ere inplikatuta egon liteke.