Ertzaintzak merkataritza-establezimenduetan eta enpresetan lapurretak egiten espezializatutako talde kriminal bateko hiru kide atxilotu ditu

Guztira hiru pertsona atxilotu dituzte eta laugarren bat ikertu dute azken orduetan, Bizkaiko Ikerketa Kriminaleko Lurralde Zerbitzuak merkataritza-lokaletan eta enpresetan egindako lapurretaren aurka egindako operatiboan.

Atxilotuei mota horretako delituetan espezializatutako talde kriminal bat osatzea eta Bizkaiko eta inguruko merkataritza-establezimenduetan eta enpresetan egindako lapurretetan parte hartzea leporatzen diete. 

Hamahiru lapurreta egotzi zaizkie merkataritza-establezimenduetan eta enpresetan (tabernak, estankoak, farmaziak…), batez ere Bizkaian, baina baita Eibarren, Elgoibarren, Laudion eta Kantabriako hainbat herritan ere; horrez gain, lapurreta horiek egiteko erabilitako zazpi ibilgailu lapurtzea ere leporatzen zaie. 

Astearte honetan, agenteek 33 eta 38 urteko bi kide atxilotu zituzten, Bilboko garaje batera sartu eta lapurtutako salgaia eta ibilgailua ezkutatzen ari zirela. 

Ordu batzuk geroago, talde kriminaleko beste kide bat, 40 urtekoa, atxilotu zuten Bilbon.

Kantabriako tailer batean lapurtutako ibilgailu bat atzeman zieten, Kantabriako Castro Urdiales herriko estanko batean egindako lapurreta batean erabilikoa. Ibilgailuaren barruan, 2.500 pakete zituzten 9 tabako-kaxa aurkitu ziren.

Atxilotuak epailearen esku utzi dituzte gaur arratsaldeko lehen orduan. 

Hiru atxiloketa horiekin eta laugarren taldekidearen ikerketarekin talde hori desegintzat jotzen bada ere, Ertzaintzak ikerketarekin jarraitzen du, eta ez da baztertzen horrekin lotutako atxiloketa gehiago egitea.

Jaitsi erantsitako dokumentua