Eusko Jaurlaritzak positibotzat jo du Ertzaintzaren «Arma Zurien aurkako Ekintza Planaren» eraginkortasuna

Bingen Zupiria Segurtasuneko sailburuak Eusko Legebiltzarreko Erakunde, Gobernantza Publiko eta Segurtasuneko Batzordean ezagutzera eman Ertzaintzak 2024an arma zuriak konfiskatu izanari buruzko datuak. Adierazi duenez, Ertzaintzaren eta udaltzaingoen prebentzio-lanari esker, 1.882 arma zuri eta 518 objektu arriskutsu atera dituzte kaletik, herritarren segurtasuna indartzeko.

Zupiriak positibotzat jo ditu emaitza horiek, eta azpimarratu du konfiskatutako arma guztiak kaleetatik kendu direla, eta, horrela, saihestu egin dela arma horiek delitu edo indarkeriazko egoeretan erabiltzea. Hori dela eta, berretsi du Euskadin objektu arriskutsu horien presentzia murrizteko helburua bete egin dela, eta horrek erakusten duela programa eraginkorra dela eta Euskal Poliziak behar bezala jardun duela.

Balantzea

«Arma Zurien aurkako Ekintza Planak», 2023an indarrean jarri zenetik, objektu horiek eramateagatik edo erakusteagatik zigorrak areagotu ditu. Aisialdi-gune jakin batzuetarako sarbideari buruzko araudia berrikustea ere ekarri du.

2024ko datu garrantzitsuenen artean hauek nabarmentzen dira:

• 1.882 arma zuri konfiskatu dira, 2023an baino ia bi aldiz gehiago, orduan 988 erretiratu baitziren.
• 518 objektu arriskutsu konfiskatu dira, delituzko erabilera izan dezaketelako.
• 1.430 administrazio-salaketa egon dira Herritarren Segurtasuna Babesteko Lege Organikoa hausteagatik.
• 885 arau-hauste penal egon dira arma zuriekin lotuta, bide judiziala jarraitzen dutenak.

Sailburuak adierazi duenez, konfiskazioek gora egin duten arren, arma zuriekin lotutako delituen kopurua proportzio txikiagoan hazi da, eta horrek adierazten du planak indarkeriazko gertakariak prebenitzen lagundu duela. «Garrantzitsua da azpimarratzea konfiskazioen hazkundea ezagutzen diren delituena baino handiagoa dela. Alde nabarmena ikusten da arma zurien konfiskazioen gorakadaren eta horiek esku hartu duten arau-hauste penalen artean. Egoera hori bereziki nabarmena izan zen 2023. eta 2024. urteetan, Ekintza Plan hori dagoeneko abian zegoen urteetan hain zuzen ere» adierazi du Zupiriak. Horrekin, Eusko Jaurlaritzak herritarren segurtasunarekin duen konpromisoa berretsi du, eta Ertzaintzak eta udaltzaingoek plana gauzatzeko egindako lana eskertu du. «Elkarrekin, hiri-ingurune askoz seguruagoa sortzen lagundu dute», amaitu du.