Ertzaintzak Zizurkilgo bizilagun-elkarte batean arazo larriak sortu dituen gizona atxilotu du

Ertzaintzak Zizurkilen bizi den gizon bat atxilotu du, bere bizilagun batzuk jazartzeagatik eta mehatxatzeagatik eta, gainera, bizi diren eraikinean kalte larriak eragiteagatik. Bestalde, pertsona horrek hainbat epaitegik atxilotzeko emandako zazpi agindu zituen indarrean.

Atzo, asteartea, goizean, Ertzaintza, Tolosako 3 zenbakiko Instrukzio Epaitegiak aginduta, Zizurkilgo etxe batean sartu zen, eta agenteek bertako bizilaguna, 41 urteko gizona atxilotu zuten.

Gizon hori hil honen hasieran salatu zuten bere bizilagun batzuek, bizi diren eraikineko horma eta trenkadetan kalte handiak egin zituelako eta horrek etxebizitzen egiturari eragin ziezaiokeelako. Gainera, objektuak bota zituen bizilagunetako batzuen etxeko fatxadaren kontra, eta hainbat kalte eragin zituen.

Gertaera horiek guztiek segurtasun falta sortu zuen bizilagunen artean, atxilotu duten gizonak jazarrita eta mehatxatuta sentitzen baitziren.

Bestalde, Tolosako eta Donostiako epaitegien hainbat atxilotze-agindu zeuden pertsona horren kontra, hainbat arrazoirengatik. Iruñeako epaitegi batek atxilotzeko eta espetxeratzeko emandako agindu judizial bat ere bazegoen.

Azkenean, atxilotua gaur goizean jarri dute agintari judizialaren eskuetan, eta Martuteneko espetxean sartzeko agindua eman du. Era berean, urruntze-aginduak ere ezarri ditu bere bizilagun batzuen alde.