Donostiako Topoaren sarea handitzeak bultzatutako hiri-eraldaketaren azken txanpa iritsi da

Izan ere, Topoak aukera emango die donostiarrei auzoak ekialdetik mendebaldera azkar eta eroso lotuko dituen garraiobide bat izateko, eta, horrez gain, hiriko bide nagusietatik zirkulatzen duten ibilgailuen kopurua murrizten lagunduko du.

Gainera, garraio azkar, seguru eta jasangarriaz gozatzeko aukera eskaintzeaz gain, mugarri horrek hiri-espazioa eraldatzeko aukera ematen du. Hiriak Topoa martxan jartzeko beharrezkoak diren lur gaineko lanak aprobetxatu ditu, orain arte autoek bereganatutako inguruneak berreskuratzeko eta oinezkoei itzultzeko, horiek goza ditzaten.

Hainbat urtez herritarrentzat deseroso izan diren lanen ondoren, hiria oinezkoentzako hiri-ingurune berriez gozatzen hastear dago, trafikoko espazio berritu eta lasaiekin, eta horietan ere garraio publikoak garrantzi handia izango du.

2025-2026 agertokia

Eraldaketa horren alde garrantzitsu bat San Martin kalea, Artzain Onaren parean, eta Loiola kalearen azken zatia urbanizatzeari dagokiona izango da. Bertan, Topoaren sarbidea kokatuko da, oinezkoentzako gune berri bat sortuz. Gune hori lehengoratzeko proiektua idazten ari dira gaur egun, eta 2026an zehar gauzatuko da.

Topoaren pasabide berrira egiteko lanek eragindako beste eremu askotan gozatzeko inguruneak sortzear daude edo batzuk jada sortuta daude, eta horietan oinezkoa da mugikortasunaren ardatz nagusia.

Antiguoko Benta Berri plazan, adibidez, 2022ko udan amaitu zen berrurbanizazioa, eta auzotarrentzako gune atseginagoa da geroztik, oinezkoentzako eta bizikletentzako guneei garrantzia emanez.

Amaitzear dagoen beste ingurune bat Aita Donostia plaza da, Anoetako Topoaren geltokian sarbide berri bat sortzeari lotutako esku-hartze bat; behin Topo berria martxan jarrita, erabilera handiagoa izango dela aurreikusten da. Lehengo biribilgunearen ordez, oinezkoentzako plaza handi bat sortu da, eta trafikoaren fluxuak nabarmen berrantolatu dira (datozen asteetan trafikoari guztiz irekita egongo da). Gainera, egiten ari diren sarbide berriak Anoeta estadioaren aurrealdea berrurbanizatzea ekarriko du, garrantzi intermodal handia izango duena, Topoaren sarbideak bidegorriekin edo Dbusen geltoki berriekin lotuz (BEAren linea barne).

Uda honetan bertan, Easo eta San Bartolome kaleek normaltasuna berreskuratuko dute, eta irekitzen direnean, oinezkoentzako leku gehiago izango dute.

• San Bartolome kalearen kasuan, Easo eta Urbieta arteko tarte hori ireki ondoren, espaloi zabalagoak izango ditu eta Urbietarako noranzkoan norabide bakarreko bi errei izango ditu (bata ibilgailu pribatuentzat eta bestea garraio publikoarentzat), zamalanetarako gune batez gain.
• Easo kalean, oinezkoentzako guneak are garrantzi handiagoa izango du, eta errei bakarra izango du, garraio publikorako. Gainera, Arrasate kalearekiko elkargunean, galtzada goratu bat sortuko da, oinezkoentzat dela nabarmentzeko.

Easo kalea bera Xabier Zubiri plazan sortuko den oinezkoentzako gune berriarekin lotuko da. Plaza hori abuztuaren amaieran amaituta egongo da, eta trafikoz inguratutako uharte izateari utziko dio, hiri-bilbeari lotutako egonaldi eta intermodalitaterako gune handi bihurtuko da. Plazak oinezkoentzako hainbat pasabide izango ditu, horietako batzuk goratuak, eta ibilgailuak igarotzeko erabiliko den Zubieta kalearen aurrealdea berdegune batek babestuko du.

Errondo pasealekuaren inguruari dagokionez, Familia Santuarekin eta Jose Maria Salaberria kalearekin osatzen duen triangeluaren parean moztutako zatia datorren uztailean irekiko da berriro. Morlans errekastoaren desbideratzearen ondorioz, obretan dagoen eremuaren berrurbanizazioa ez da osatuko 2026ko lehen zatira arte. Azkenik, Errondo pasealekutik Amarako etorkizuneko geltokirako sarbidea (gaur egungoa ordezkatuko duena) egingo da, Easoko trenbide-hondartzan jarduerak amaitu ondoren.

Zaragoza plazarako partaidetza-prozesua

Topoaren lanekin lotuta abian jarriko diren hurrengo esku-hartzeetako bat Zaragoza plazari buruzkoa da. Ildo horretan, Udalak, inguruko eragile batzuekin batera, partaidetza-prozesu bat egingo du etorkizuneko plazaren diseinua herritarrekin lantzeko.

Datorren apirilaren 28an, 19:30ean, lehenengo bilera egingo da Udaletxeko Osoko Bilkuren Aretoan, Herritarren Partaidetzarako Zerbitzuak zuzenduta. Bertan parte hartuko dute Proiektu eta Obrak eta Mugikortasun zuzendaritzek, inguruko bizilagunek, merkatariek eta inguruko beste jarduera ekonomiko batzuen arduradunek.

Lan-saio horretan, plazaren lehen zirriborro bataurkeztuko da, eta hortik abiatuta, elkarrizketa bat hasiko da, azken diseinurako beharrezkoak diren ondorioak ateratzeko. Eztabaidarako abiapuntu horrek oinarrizko irizpide batzuk betetzen ditu dagoeneko:

• plazaren iragazkortasun handiagoa bilatzea,
• bere bilbean eta inguruko espazioekin jarraikortasuna izatea,
• dauden saltokien balioa nabarmentzea
• edo kalitatezko egonaldirako espazioak izatea.

Saio honetan eta ondorengoetan landutakoarekin, eta beharrezko bideragarritasun-azterketak eginda, amaierako proiektu bat idatziko da, inguruko eragileen beharrak asebeteko dituena; ETSri helaraziko zaio, eta hura arduratuko da berrurbanizazioa gauzatzeaz. Espazio hori hutsik geratuko da Topoaren trenbide-pasagunea zerbitzuan jartzen denean.

Hurrengo lanak

Aipatutako esku-hartzeak gauzatzeko, azken lanak egin beharko dira datozen hilabeteetan, eta horietako batzuek eragina izango dute trafikoan. Izan ere, Topoarekin zuzenean lotutako obrez gain, hiriko saneamendu-sare nagusia hobetzeko aprobetxatzen ari dira.

Beraz, azken txanpa honetan honako lan hauek egingo dira:

• San Bartolome kalea berrurbanizatzea (Easo – Urbieta): Ibilgailuentzat itxita jarraituko du uztailaren hasierara arte.

• Easo kalea berrurbanizatzea (San Martin – San Martzial): Tarte horrek azken txanpari egingo dio aurre, eta apirilaren 22tik uztailaren hasierara arte itxita egongo da. Trafikoa San Martin / Manterolatik desbideratuko da. Arrasate kaleak, Easo parean, mozketa puntualak izango ditu epe horretan.

• Gune horretan ibilbidea egiten duten

Dbuseko lineek ibilbidea aldatuko dute

• Xabier Zubiri plaza berrurbanizatzea: Plaza itxita egongo da abuztuko bigarren hamabostaldira arte, trafikoari eragin gabe. Orduan irekiko da berriro, Easo kaleari lotutako oinezkoentzako espazio berrituarekin.

• San Martin saneamendua: Saneamendu-lanekin jarraitzeko, apirilaren 23an, asteazkena, Urbieta kalea, San Martin parean, bi erreira murriztuko da hilabete batez, gutxi gorabehera. Trafiko pribatua Askatasunaren hiribidetik desbideratuko da, garraio publikoa Urbietatik igarotzea lehenesteko. Ondoren, Urbieta kalea, San Martin kalearen parean, errei bakarrera murriztuko da, zehaztu gabeko asteburu batzuetan.

Erlazionatutako dokumentuak