Herritarrei arreta azkarrago, erosoago eta itxaron beharrik izan gabe eman ahal izango zaie. Zerbitzua Bizkaira hedatuta, Euskadi osoan ezarrita geratu da 2023ko maiatzean, proiektu pilotu gisa, Gasteizko Ertzain-etxean abian jarri zen eta 2024an zehar Arabako eta Gipuzkoako lurraldeetan ere ezarri den zerbitzu hori.
Eusko Jaurlaritzak gaurtik, maiatzaren 1etik, aurrera Bizkaira hedatu du herritarrei lurraldeko edozein Ertzain-etxetan presazkoak ez diren salaketak jartzeko eta izapideak egiteko aukera ematen dien hitzordu-zerbitzua. Ekimen honen helburua herritarrei arreta azkarrago, erosoago eta itxaron beharrik izan gabe eman ahal izatea da, nahiz eta zerbitzu hori erabili ez duten eta ertzain-etxeetara agertzen diren pertsona guztiei ere arreta ematen jarraituko duten.
Azken hilabeteotan proba pilotua Gasteizen egin ondoren eta gero Araba eta Gipuzkoa osora hedatu ostean, hitzordu-sistema Ertzaintzaren Bizkaiko ertzain-etxe guztietara hedatuko da gaurtik aurrera.
Prozedura sinple eta intuitiboa
Hitzordua eguneko 24 orduetan eska daiteke Jaurlaritzaren web-atariaren bidez. Zehazki, www.euskadi.eus/cita-previa-ertzaintza atalean. Sistema oso sinplea eta intuitiboa da, eta aurrez aurreko hitzordua Euskadiko edozein ertzain-etxetan asteko zazpi egunetan, 8:00etatik 21:00etara bitartean, hartzeko aukera ematen du.
Hitzorduaren bidez, presazkoak ez diren salaketak jar daitezke (iruzurrezko karguak, kalteak, dokumentuen edo gauza pertsonalen lapurreta, ibilgailuaren lapurreta edo ibilgailu barruko lapurreta) edo presazkoak ez diren izapideak egin daitezke (agirien galera edo adingabeak gurasorik gabe atzerrira bidaiatzeko baimenaren kudeaketa). Nahikoa da oinarrizko datu pertsonalak betetzea eta harremanetarako telefono-zenbaki bat eta helbide elektroniko bat ematea, eta herritarrak bertan jasoko ditu sortutako hitzorduaren jakinarazpenak eta gogorarazpenak. Hitzordua eskatzen denean, azken pantaila batean agertuko dira bildutako datuak, eta hitzorduaren egiaztagiri gisa inprimatu ahal izango da.
Digitalizazioa
Zerbitzu hau herritarrek Ertzaintzarekin, ertzain-etxe batera joan beharrik izan gabe, online oso-osorik egin ditzakeen kudeaketen zerrendari gehituko zaio, adibidez: larriak ez diren delituen online salaketak aurkeztea, Ekinbideren bidez hobetzeko iradokizunak eta kexak aurkeztea, adingabeak atzerrira irteteko baimen sinpleak eskatzea, drone-hegaldietarako operazioak eskatzea edo manifestazioak edo bilerak jakinaraztea.