24_0507 Bilbo, emakume bat hil da bikotekideak arma zuriz egindako zaurien ondorioz
Bilbo, emakume bat hil da bikotekideak arma zuriz egindako zaurien ondorioz
Prentsa Zerbitzua
2024-09-12
Gaur goizaldean 34 urteko gizon bat atxilotu dute Bilbon, bere bikotekidea, 31 urteko emakume bat, ustez hiltzeagatik. Santutxu eta Atxuri arteko etxebizitza batean hil da, arma zuriz egindako zaurien ondorioz.
Gertakariak goizaldeko 00:23ak aldera izan dira, Bilboko etxebizitza batean. Bizilagunek Ertzaintzari deitu diote entzuten ari ziren oihu eta zaratengatik, eta berehala bertaratu dira Bilboko Udaltzaingoaren eta Ertzaintzaren patruilak.
Etxe barruan, arma zuri batekin egindako zauri handiak zituen emakume bat aurkitu dute agenteek. Ondoren, mediku batek heriotza egiaztatu du.
Gertakarien ustezko egilea ere bertan zegoen, eta harekin bizi zen biktima. Bilboko udaltzainek kontrolatu eta atxilotu egin dute, Ertzaintzaren agenteekin batera. Antza denez, gizonak arazo psikiatrikoak zituen eta ospitalera eraman dute.
Ertzaintza atestatuaren instrukzioaz eta ikerketaz arduratzen da, eta ez du aurrekaririk, ez eta bikote horrekin lotutako genero-indarkeriaren erregistrorik ere.