- Hilabeteko batez besteko tenperaturek 2,5 ºC-ko anomalia positiboa izan dute 1991-2020 aldi normalarekin alderatuta
- Mende honetako otsailik lehorrenetako bat izan da
Euskalmet – Euskal Meteorologia Agentziaren arabera, otsaila lehorra izan da orokorrean, eta oso lehorra izan da Kantauri barnealdean, normala den euriaren erdia baino gutxiago egin baitu. Otsaila oso beroa ere izan da, 2,5 ºC-ko anomalia positiboa izan baitu 1991-2020 aldi normalarekin alderatuta. Datu horiekin esan daiteke mende honetako otsailik lehorrenetako bat izan dela, nahiz eta ez den iritsi 2008ko eta 2020ko defizitera, urte horiek baitaude serie historikoen buruan.
Prezipitazioei dagokienez, baliorik altuenak Gipuzkoa ipar-ekialdean, Nafarroako mugan, erregistratu ziren (Eskas 104.6 l/m², Añarbe 103.4, Ameraun 103.2 eta Ereñozu 102.4), eta, bigarren mailako maximoekin Bizkaiko kostaldean (Matxitxako 99.2 l/m², eta Mungia 91.3) eta Gipuzkoako barnealdean (Zegama 87.5 l/m², eta Andoain 86.4). Era berean, Arabako hegoaldean eta mendebaldeko Arabako Lautadan egin zuen euri gutxien (Zambrana 33.2 l/m², Nanclares 34.1, Moreda 35, Espejo 35.4, Kanpezu 37.2 eta Alegría 39).
Euskalmeten arabera, hilabeteko egunik euritsuena 12a izan zen; EAEn batez besteko prezipitazioa 11.5 l/m²-koa izan zen. Prezipitazio horiek lurralde osoan zehar banatu ziren, baina bereziki ugariak izan ziren Bizkaian eta Gipuzkoa ekialdean, Bizkaiko kostaldeko leku jakinetan oso ugariak (Matxitxako 47.2 l/m², Almike 27.3, Mungia 27, Añarbe 25.6 eta Derio 24.2).
Otsaileko batez besteko tenperaturak oso beroak izan dira. Kostaldean 11-12.5 ºC inguruan ibili dira, eta Arabako Lautadan 7 ºC inguruan. Mende honetako bosgarren otsail beroena izan da, baina 2021eko otsailetik urrun.
Egun hotz batzuen ondoren, otsailaren 8tik aurrera tenperaturak igotzen hasi ziren, eta balio epelak nagusitu ziren hilaren erdialdetik 20ra arte. Egun batzuetan tenperaturak 23 ºC-ra iritsi ziren kostaldeko eskualde batzuetan (Oleta 24.7 ºC, Oiartzun 23.8, Zizurkil 23.8, Alegia 23.5 eta Arteaga 23.3 ºC).
Tenperatura horiekin batera izan zen intsolazioa normala denaren gainetik bili zen, eta eguzki-orduak % 20-40 gehiago izan ziren lekuaren arabera. Hiriburuz hiriburu, Bilbok 137 eguzki-ordu izan zituen, Donostiak 134 eta Gasteizek 142.
Muturreko egoerei dagokienez, otsaila hilabete oso lasaia izan da. Berez, Eusko Jaurlaritzak 9 abisu hori bakarrik aktibatu zituen, guztiak hilabetearen lehenengo herenean izotzarekin lotuta, eta hilaren 7tik 8rako goizaldean elurragatik kota ertain-altuetan.